Lou remembre del Ounge de Nouvembre s’espaço dien la brumo del temp. L’emouciou que soullèvo es inquèro ouficialo, mas pas pu briso poupularo : lou païs visco pas pu la dato dien lou reculiment. Tant que de testimòni e d’actours de la « Grando Guèrro » demouravou noumbrous, aquel aniversàri beilavo l’escazenço d’una coumuniou coulectivo, de charrados e discussious entre amics e dien lei familhos. I avio prou de rescapats per counta l’ourrour viscudo. Cadu èro pres dienc una memòrio vivento. La rantèlo de fi es toumbado soubre aquelo periodo memourialo.
E pamen, chau countunha maugrat tout de teni lou ounge de nouvembre per una dato impourtanto. Vaqui perqué.
Suïcidi de l’Europo, sacrifìci injustifiable qu’o tuat una generaciou entièro, la guèrro de 14 fourniguejo de leiçous que devem inquèro medita. L’axiomo di lums èro : lou prougrès dei sciéncios, de las tecnico e dis arts engendro necessàriomen lou prougrès umô. S’es troubat negat.
Quau poudio creire à l’albo del sègle Vint, qu’uno èro de sóuvajario sans parièro s’anavo doubri soubre lou countinent euroupenc ? A la debuto de 1900, lou regent de « La Glòrio de moun paire » se fo davant sis escoulans lou chantadour ouptimisto del sègle niòu, lou del prougrès e de la patz. Quonho ilusiou candido ! La guèrro de 14-18 fouguet una regressiou umano e un requiòu de la civilisaciou dien lou meme temp qu’èro la coundiciou de prougrès tecniques.
Del temp que flourissiou lis arts e lei letros, que l’educaciou dintravo dien toutos lei jassos soucialos, del temp que las descoubèrtos tecnicos e scientificos faziou requioula lei malautios, que lou coumfort adóucissio l’eisisténcio, que l’abrivado di trasports aturavo lis omes, la barbario se desboundet coumo jamai al quite sé dei nacious que s’afourtissiou lei mai civilisados. Es una leiçou de la guèrro : la culturo es pas una barrièro soulido countro la barbario. Qué de mai refinat que la civilisaciou euroupenco en 1913 ? Qué de mai barbare qu’aquelo medisso Europo en 1915 ?
Atau, lou ounge de nouvembre nous counvido de poundera soubre la fragilitat de la civilisaciou. Tout ço que, abans la guèrro, èro vist coumo vìci, murtre, injustìcio,panatòri, vioulaciou, devé durant la guèrro vertut. L’esperit critique, aquelo grando counquisto de l’umanitat, es criminalisat per l’enclouscatge ; la proupagando remplaço l’infourmaciou, del temp que se counvido lis omes à se coumpourta coumo d’animaus en troupèls. Freud l’avio remarcat en 1915 : la civilisaciou aparèis pas que coumo una jasso tèunho, prouducho per l’educaciou e lei normos mouralos, lou refoulèri de l’agressivitat se fendasclo talèu que proumetou à l’ome la satisfacciou brutalo de quauquos pulsious arcaïcos. Uno evidéncio gisclo d’aquelo guèrro : la barbario venguet pas « del deforo », de pobles supausats men civilisats, venguet pas tampauc de las classos perilhousos que li gents coumo chau guinhavou del det despuèi la revolto di canuts, venguet del quite cor de la civilisaciou. La barbario pot naisse dien cado ome.
Aquelo guèrro o dounc counfirmat la vertat capudo d’un adàgi vièlh : « homo homini lupus » - « l’ome es un loup per l’ome ». Ni la civilisaciou ni lou prougrès aun pas capitat de tua lou loup feroce que peneco al sé de cadu de nautres, e qu’avem engabioulat per lou refoulèri, del temp qu’espèro pacientomen que lis esdevenenços (e la guèrro n’es uno) li vengou baila larjour. Lucide, lou cristianisme o dounat d’à bèl briou un noum à-n-aquel loup increbable que la sicanalìsi o tournat descoubri : lou pechat ouriginau.
Doublidessam pas lou ounge de nouvembre. I o pas mai de qué festija la victòrio d’una naciou euroupenco soubre sa vezino, fai un sègle. Acò’s pamen una dato que coumto e que desvèlo, un esturment d’ouptico que relèvo la precaritat de la civilisaciou e la fragilitat de l’ome davant la barbario que porto en el-meteus.
Visto d’aquelo amiro, la fèsto de la Victòrio se chàmbio en leiçou de filosoufïo.
Roubèrt REDEKER
La Despacho del Miejour : 11/XI/ 2007
